نبیسۆک: ھمیدا شستان

مرۆچان کرونا ویروسا که درستێن دنیا پتاتگ و دْرستێن مُلکانی هکومت په وتی مردمانی جاندْراهیا گۆن وتی راجئے سر و سۆجا ، لس مردمانی واکسن جنَگا و آیانی لۆگا مانَگا دزگٹ اَنت ،بله اێرانئے هکومت دگه پندے جنَگا اِنت.

آ وهدا که بازێن مُلکێا وتی مردم کرنتینه کرت و مساپرانی رئو و آ دگه ملکان کم ترّت، بله اێرانا هما پێسریگێن ڈئولا هَندی و میان­اُستمانی سئیل و سپر برجاه اتنت. هما ڈئولا کار و بار و سرکاری کارگِس جاری اتنت. په نادْراهیئے شنگ نبئیگا هژدری اَت هکومتا مردم سر و سۆج بکرتێننت که لۆگا بنندنت و آیانی مالی کُمک بکرتێننت، بله دگه ڈئولا کُرتی و اے مُلکا که امنیّت و جاندراهی اهمّێن گپّے نه­اِنت، ویروس کرونائے شِنگ بئیَگ پدّرێن گپّے.

بلۆچستان و سیستانا که مردمانی جاندْراهی، اهمّێن اُگدهے په هکومتا زانگَ نبیت و دێریگێن وهدے اِنت که آ چه وتے ائوَلی پدّرێن هکّان چۆ که امنیّت،سر و سۆج و وانگ و زانگا زبهر اَنت، اے مُلک گۆن کرونا ویروسئے شنگ بئیَگا بازێن جنجالێئے آماچ بوت.

انّون گۆن دلتائے ویروسئے شِنگ بئیَگا بلۆچستانئے مردم مزنێن گپچلێا کپتگ­انت. گۆن پکّاێن واکسنئے دست نکپگا و واکسن جنَگئے وهدئے ودّگا اے نادراهیا درستێن کهۆل په تْرندی وتی آماچ کرتگ­اَنت و بازێن کماش و ورناے کُشتگی. اے کشندهێن نادراهیئے دێمپانیا سرکاری نادراهجاه گۆن باز نگێگی و زبهریا دچار اَنت.

بلۆچستانئے بازێن کلّگے چه نادراهگِسا زبهر اِنت و اے مردم باید اِنت دیرێن راهێا برئوَنت تان وتا په یک نادراهجاهێا برسێننت.بازێن کرونایی نادْراهانی زْرابا و داکتر و درمان و آمبولانس و ونتیلاتورئے کمّیا ، مُلک گێشتر نگێگ کرتگ و بازێن نادراهێئے هالت هرابتِر بوتگ و بازێنے مَرکئے آماچ بوتگ­. بازێن مردمێئے سرگوَست وهدے که گۆن نگێگێن هالتێا گۆن اے نادراهیا دێم­په­دێم بوتگ­اَنت گوَشگ بوتگ و من لۆٹان آ کسِّها بگوَشان که گێشتر دلبڈّی بدنت.

پری ناز وتی لاپ­پرّیئے گُڈّی ماهان گوازێنگا اَت و چه کرونائے نادراهیئے پهازگا بازێن وهدے اَت که لۆگ­نند بوتگ­اَت، چۆ که گۆن وتی کهۆلا گند و نندی نکرت. آییا په وتی جاندْراهیئے پهازگا بازێن کۆشستے کرت.

آییئے و آییئے وسّیگئے لۆگ یکجاہ اتنت و آیان وت­مان­وتا باز گندُک کرت. وهدے که بلۆچستان کرونائے آماچ اَت، آییا تُرسِت که آ هم اے نادراهیا گرپتار ببیت.جنێنانی داکترا گوشتگ­اَت که وتا هُژّار بکنت که لاپ­پرّێن کرونایی و آیانی ننّک گێشتر مَرکئے آماچَ بئینت.

پری نازا بازێن وهدے اَت که وتی مات و کهۆلی ندیستگ­اتنت و زهیری کرت. بله لۆٹتی که گێشتر وتی هئیالا په وتی و چکّئے جاندْراهیا گوَر بکنت.

همے وهدا که بازێنے چه آییئے نزّیکێن مردمان کرونا دلتائے آماچ بوت، آییئے مرد و آییئے وسّیگ هم نادراه بوتنت و کرونائے بنداتی رۆچِش گۆن سکّی و سۆریا گوازێنت. نادراهِش بُرت و دگه لۆگێا واپێنتنت بله پدا هم پری ناز کرونائے گرپتار بیت و بنداتی رۆچان مزنێن تپ و نزۆریئے آماچ بوت.

وهدے که پری نازئے مات چه آییئے هالا سهیگ بوت باز پرێشان بوت. آ دگه شهرێا نشتگ­اَت. چُنت رۆچ پێسر آییئے ھمساهگ که ورناێن جنێنے اَت و لاپ­پرّیئے گُڈّی رۆچان گْوازێنگا اَت کرونا دلتائے سئوَبا گۆن وتی لاپئے چکّا بێران بوتگ­اَت.هپتگێئے تۆکا آییئے پنچ همساهگ کرونا دلتائے سئوَبا مُرت.گوَشئیگان اے وهدا بلۆچستانا ابێتکێن مَرک و مۆتکئے بۆ آتار اَت. و دْرستێن مردم ناامێت و تکانسُر اتنت.

پری نازئے ماتا لوٹِت که زوت چُکّئے کر٘ا برئوت، بله پری ناز و آییئے وسّیگا نمنّت .پرچیا که زانتِش اے نادراهی چۆ جلۆکێن آسێا دْرستانَ سۆچیت. پدا بله ماتا وتی دل پرّ کرتَ نکرت و وتا وتی چکّئے لۆگا سر کرت.

پریناز که لاپ­پرّێن جنێنانی داکترئے نِزرئے چێرا اَت، هپتگے رَند چه نادراهیا آییئے هال بدتر بوت . هیسک بوت و آییا اکسیجن جنَگئے زلورت بوت. دْرستێن داکتر په آییئے زاهدانئے راه دئیَگا تپاک نه­اتنت بله جنێنانی داکترئے بازێن گوَشگان آییارا زاهدان دێمِش دات.

پری نازئے مات و تْرو آمبولانسا آییئے همراه بوتنت و آییئے ناکۆ و زامات گۆن وتی گاڑیا زاهدانا راه کپتنت.آمبولانس کلنڈێنے اَت و تێز رئوگا اَت. پری نازئے مات و آییئے تْرو سندلیئے سرا نشتگ اتنت بله گوَشئے آ آزمانا هُلُک وَران اتنت. آمبولانسئے تێزی و هرابی و راهئے نئوَشّیان برے برے آیانی سر ماشینئے چتّا لگّت. کُلُپّان اتنت. آ پرێشان اتنت که نادراهئے تهت متْرینزیت و نادراها ڈنّا دئور مدنت. آ گێشتر نادراهئے هئیالا اتنت تان وتیگا.

دۆ ساهت چه راها نگوَستگ­اَت که ماشین اۆشتات.هراب بیتگ­اَت.نَرسا پری نازئے اکسیجن چارِت و پری نازئے مات و تْرو یک مردێن بلوچێئے تهتالا کپتنت که چُنت رۆچ پێسرتِر هیسکی و آمبولانسئے هرابیئے سئوَبا هۆنئے اکسیجنی کم ترّتگ و راها ساهی داتگ­اَت. مردمان وه گۆن اے نگێگی و نگْوَمّی و ڈالچاریا آدت کتگ­اَت ،بله پدا هم آ مجبور اَنت وتیگ و وتی آزیزانی جانئے رکّێنگا وت پگرے بزورنت.

پرینازئے ناکۆ و زامات که هما نزّیکان اتنت مکانیکێئے کرّا شتنت و مکانیکِش گۆن وتی ماشینا آمبولانسئے کرّا بُرت. بلۆچستانئے گرماگ چه مردمئے واکا ڈنّ اِنت و چلّ درجهی گرمئے چێرا نندگ مان بلۆچستانئے گیابانان دْراهێن مردمان بێهاٹیگَ کنت نه اے که نادراهے اَت و گۆن مَرکا گلاێش اَت. پری نازئے مات و آییئے تْروا آ گۆن وتی نکش و نگارێن آستونکان گَوات جت و وت هێدان میچّلتگ­اتنت گوَشئے آیان جان شُشتگ­اَت و نپَس کشّگ اے جاوَرا باز مشکل اَت.ساهتێا رند مکانیکا آمبولانس اڈ کرت و آ راہ کپتنت.

پری نازئے ماتا جێڑِت که اگن آییئے برات و زامات گۆن مبوتّێننت بارێن آییئے نازهکێن چکّ چۆن بوتگ­اَت. همے پگر و وسواسان آ تکانسر کرتگ­اَت.گُڈسرا بازێن پندێئے برّگا آ نادراهجاها رسِتنت.پرینازِش کروناییانی جاها برت.آ گُلکۆسِش چاڑێنت و ونتیلاتورِش پیٹ کُرت. پری نازا مارِت که آ دگه دنیایێا اِنت.بس برے برے وتی مات و تروئے تئواری اشکت که آییئے هالپُرسیا کنگا اَنت. چُنت رۆچا رند داکتران آییئے تْرو گوَشت که آییئے هۆنئے اکسیجن شرّ بیتگ و بس برے برے آییارا اکسیجن چاڑێنگَ لۆٹیت . آییئے تپ کمتر بیتگ.

پری ناز که تپ و اکسیجنئے دَزگاهئے کارمرز کنگئے سئوَبا باز بێهاٹیگ بوتگ­اَت گێشتر وتی لاپئے چُکّئے پرێشان اَت.جنێنانی داکترا گوَشتگ­اَت که باید اِنت آ زیت­تِر وتی چُکّا بیاریت اگن نه مات و چُکّ هتَرئے تۆکا اَنت.گۆن داکترئے شئور و ماتئے دلبڈیا پری نازا په وتی چُکّئے هاترا دل ڈڈ کرت و اراده­ای کرت اے نابرۆبرێن پڑا سۆبمند ببیت.

پرینازا گۆن بازێن زهمت و مزنێن ارادهێا و نادراهجاهئے نَرسانی دزبۆجیا شررنگێن جنکّے آئورت. بله کرۆنائے نادْراهی و بازێن جنجالان آ پهک نزۆر کرتگ­اَت. چِلّه بئیَگا رند آ تهتئے سرا تُست.چُنت وهدا رند که آییا وتی چمّ پچ کرتنت تْروی کرّا نشتگ­ات.

پرینازا وتی ننّکئے هال گپت و تْروا گوَشت که نَرسا تئیی مات گۆن چُکّا لۆگا راه داتگ­اَنت. پرچیا که ادا کروناییانی جاگاه اِنت و په ننّکا شر نه­اِنت. و آ هم رۆچے رند چُٹّیَ بیت.

آ گَل ات که آییا سالمێن جنِکے دنیایا آئورتگ و وت هم چه کرونائے وئیلا رکّتگ. آ ژندیا پدا واب کپت. پاد آیَگا رند آ سهیگ بوت که آییئے دۆستێن تْروا که اے دْرستێن وهدا آییئے دزبۆج بوتگ، کرۆنائے آماچ اِنت و گۆن تْرندێن تپێا آییئے کِرّا تهتێئے سرا وپتگ.

آ دگه رۆچا داکترا آییئے تْرو اِلاج کرت بله آیان لۆٹت که لۆگا کرنتینه ببیت و وتا اِلاج بکنت.اے وهدا پری نازا وتی چک امبازان گپت و آییئے بۆیی په وشّی مارِت. آ جێڑگا اَت که نامے جنکّا ببندیت که مات و چُکّئے جهد و زندئے امێتا پێش بداریت و گۆن وتی مردئے شئورا که دنیگا گۆن کرونایا دزگٹّ اَت.

آییئے نامِش کرت گُل­هزار. بلۆچستانئے سیاه و تهارێن کرۆنائے جاوَرا،گل­هزار مات و جنکئے دۆستی و زندئے امێتئے یَک دروَرے. یک چێدگے که بلۆچ هر سکّێن جاوَریا بْرانزے در گپتَ کنت تان گۆن نگێگی و نگوَمیّان دێم­په­دێم ببیت و وشترێن آسرالێئے شۆهازا ببیت و گۆن مستِرێن ارادهێا وتا ساڑی بکنت تان بهترێن زندے په گُڈّی پدرێچا بٹهێنیت.