نبشتانک: التاپ بلۆچ

انگلێسی رجانک: ماه گنج تاج

آ وتی شهرا اێوک اَت. تێوگێن شهرا دگه کَسّ هم نێستا اَت. آییا اێوکی وشّ بوتگ اَت. اے شهرا دگه کسّ آباد نه اَت، آییا ابێد. شهرۓ جلوه و ندارگ انچۆ دلکشّ اَت که مُرتگێن دل بۆدَ کنت. هر نێمگا شیرکنێن آپۓ کئور و جۆ تچگا اتنت، باگ و باگیچه سبز و آباد اتنت. هر تهرۓ مُرگ، دَلوت و جانوَر اے شهرا هست اَت. اَبرَمۓ دِلکَشّێن ندارگۓ همراهیا مۆسمۓ هسابا اے شهرۓ بدل نێست اَت. هر رۆچ شهرۓ یَکّ نه یَکّ کْنڈێا جمبر ساهێل اتنت و هئور گُوارگا اَت. هر کجام شَرّی و زێبایی که یَکّ شهرێے واستا الّمی اِنت، آ چیزّ اے شهرا هست اَت. آ، اے شهرۓ یکّێن واهند اَت. آییارا اَێوکیا هچبر بێتاهیر نکُرتگ اَت و آوتی اێوکیا سکّ شات و گَل اَت.

یَکّ رۆچے آییا هئیال کرت که چه هُشکێن نِندگا ناۓ گَڈّگ کنگ گهتر اِنت. چیزّے نه چیزّے کنگی اِنت. گڑا چے کنگی اِنت؟ آییا چُرت جت که انچێن کارے کنگی اِنت و انچێن چیزّے منا سازگی اِنتکه منی شهرا انگت نێست انت. بله منی شهرا وَه هر چیزّ هست. کجام چیزّ اِنت که پَشت کپتگ؟

یکبرے پدا همے سئوَڑ گا بوت. بازێن پِگر و جێڑهان و شهرۓ گَرد و سئیلا پد، آییا مارِت که منی شهرا وَه هر چیزّ هست اِنت بله اگن یَکّ چیزّێۓ کمّی اِنت ، آ “بُت” اِنت. بزان آییۓ شهرا بُت نێست اَت ودگه هر چے هست اَت. آییا پئیسله کرت که من جُوانێن، بُرز و بلند و مزَن شانێن بُتے ٹهێنان. آییا، شهرۓ زێباترێن و سبزهزارێن و بُرزترێن ٹُلّێا مزنێن درچکیۓ کَشا که دگه هِچ نێست اَت، شُت و مزنێن سنگے اێر کرت و بتۓ تراشگی بنا کرت.

ماه و سال گواتنت و آگۆن همے سِنگێن بُتۓ اَڈّ کنگا مشکول اَت. یکّ رۆچے آییا مارِت که بُت تئیار اِنت. اے بُرز و بلندێن باره بند و شێپگ پۆنزێن وَشرَنگ و ڈئولدارێن جنِکّی بُتے تئیار اَت .

اے بُتارا بنی آدمی انچێن رنگے جتی که چۆ انسانا بوت و کَسّا هم پجّاهَ نئیاورت که اے اَسلی انسانے یا بُتے. اِشیۓ گور چۆ پُلّا سرَپتگ اتنت و پادانی شَما گوَشئیگا بێنَگ پِٹگا اَت. اِشیۓ لُنٹانی سرا انچێن بچکندے سَهرا بئیگا اَت که چه تێوگێن شهرا زێباتِر اَت. اِشیۓ چمّانی تها گوَشۓ اُمێتێۓ دُنیاێا وتی بانداتۓ رُژناێن سپرے بندات کرتگ اَت.

آییا بُت چارِت، تَه وت هئیران و هبکّه بوت که اے چێے که من شَرّ کےت. آییا بێسه نێست اَت که اے رنگێن ڈئولدارێن چیزّے جۆڑَ بیت. آییا جێڑِت که اے ڈئولارێن بُت که اِدا اێوک ببیت، جلوهَ ندنت. اِشیۓ کَشا دگه یَکّ بُتے ٹهێنان که بلّی دو بنت. آییا دگه همے کَدّۓ سِنگے آورت و دگه بُتێۓ تراشگ بنا کرت. ماه و سال گواستنت و اے بُت هم تئیار بوت. دوێن بُت یکّے دومیا سکّ نزّیکّ اَتنت. دومی بُت که تئیار بوت تَه اے مردێنی بُتے اَت.

اے بُتانی جۆڑ کناگا پد، آ سکّ گَل و وشّ بوت که نون منی شهر ڈئولدارتِر اِنت. هما چیزّۓ کمّی که بوتگ، نون سرجم اِنت. یکبرے پدا آ وتی شهرۓ سئیل و ندارگا در آتک. شهر سَکّ مزن اَت و دێر گوَستگ اَت که آ گۆن اے بُتانی تراشگا دزگَٹّ بوتگ اَت. آییا شهرۓ سرجمێن سئیلا یکّ هپتگۓ لگِّت. هپتگێا پد واترّ هما جاها آتک که اۆدا آییا بُتشَرّ کرتگ اتنت، تَه هئیران و هبکّهَ بیت . . . سنگ و سیاهَ بیت . . . دوێن بُت اِدا نه اَنت. ..

یکبرے پدا تێوگێن شهری گۆلِت تَه اے بُتانی هِچّ جاگه سۆج نێست اَت. آ جێڑگا اَت که اے شهرۓ چارێن کُنڈ بَند اَنت، شهرا آییۓ هُکما ابێد نه کَسے پُترتَ کنت و نه که کَسے در آتکَ کنت. گۆن همے جێڑگ و وَسواسان آییارا مرۆچی ائولی برا کۆچنڈگا گِپت و آ، باگۓ سارتێن ساهگێا واب کَپت. چه وابا که بُستی کرت، آییۓ نِزّا مزنێن ساهتے گوَستگ اَت. چمّی پچ کرتنت ته سیاه و تهارێن زندانێا بندیگ اِنت. آ جێڑگا اَت که چے بئیگا اِنت؟ منی هستی و دُنیا اے رنگا بدل بئیان اِنت. اے چۆنێن اِسرارێا منا گپتگ.

دمانێا پد زندانۓ یَکّ دروازگێۓ پچ بئیگۓ تئوار بوت. زمزیلانی ژلیکّ ژلیکّ اَت. کسانێن رُژناییے ٹِمبان اَت. دو کَس آییۓ نێمگا پێداک اَت که چه دورا آیانی دێم گِندگ نبوتنت. نزّیکّا که سر بوتنت، ته تێوگێن زندان رُژنا بوت. آییا اے که دیستنت، هُشک و هئیران بوت. چێا که اے هماییۓ جۆڑ کرتگێن دوێن بُت اتنت که آییا گۆن وتی جندۓ دستان جۆڑ کرتگ اتنت.

نون آییا یات آتک که من اے بُت هما درچکۓ کَشا جۆڑ کرتگ اتنت که اے درچکۓ سارتی و وشبۆ درچێا بلگّیت، آییۓ تها زِند، اَگل و دانش ودیَ بیت. بله نون . . . باز وهد گوَستگ و لئیب چه آییۓ دستا شُتگ اَت و اے شهرۓ واهند همے بُت بوتگ اتنت که وتی جۆڑ کنۆکۓ ناما هاکمی کنگا اتنت. هر چَرِند و پَرِند، سهدارِش وتی تابِه جۆڑ کرتگ اَت و اسلێن واهُند یَکّ تهارێن زندانێا بند اَت و چه پشۆمانیا بَشبش ورگا اَت.

چاپ و شنگ: تاکبند.اِستین، آزمانک نمبر. نئومبر 2018

منتوار: گۆشان نکپتگێن تئوار