مَھپلی بانئے تھا دێم په چێر کپتگ‌اَت، دوێن دستی دێما اَتنت، دێمی گۆن بانئے تگردا سکّ‌اَت و گُلّی ٹَپّ اَتنت، آ ھئیران اَت که منی دراھێن زندئے مُزّ منا رَست، منی مِھرئے آسر اِے بوت، من کَئے اَتان که تئو گۆن من اِے وڑا کُرت، تئو منا ھِچّیگی نکُرت، منی مِھر، منی وپا، منی کربانی، منی شپانی نیاد، منا اِے دراھێنانی مُزّ چے رَست تھنا سَئے گَڈّگ،،، اینچُک نِزّۆر اَت مئے سیادی که سَئے لبزان ھلاس بوت من چۆن باور بکنان که تئو منا یله دات، من وتارا چۆن بِسَڑێنان که تئو چه من سِست و جتا بوتئے، آ سال و ماھان چۆن بێھئیال بِکنان که من گۆن تئو گوازێنتگ‌اَنت، انگت منی دپا نکاهئے شپئے شیرانی تام نپْرشتگ تئو چۆ پێسرا منی دپ کُچّلا زھر کُرت ، آ پێشانی که تئو آییئے تئوسیپا بس نکُرتگ‌اَت ھمے پێشانیئے سرا تئو بلاھێن داگے اێر کُرت، منا چاگردئے تھا ائیبدار کُرت، من نون چۆن تئیی دێما کپت کنان که تئو منی زاھر و باتنئے یک یک گپّیا سرپد اَتئے، اُپ ھدا من چۆن بکنان، آییا په بزّگی اُپّارے کَشّت، دێم په چێریا که دمی بُرت دل په لاپ بوت اینچُک گرێوگ و جێڑگا دێمی سُھر چَک اَت، پۆنز و گُلّئے سر تگردا ٹَپ کُرتگ‌اَتنت. چمّی کپتنت بانئے کُنٹان که یک ڈومبوے کُنٹئے یک ٹنگێا چه در کپت و دومیا پُترت، آییا ھئیال کُرت که اِے کُنٹ ڈومبوئے لۆگ‌اِنت بله نون منی لۆگ کجام اِنت؟
اِے ڈومبو یک ساھتے اِے کُنٹا یله نکنت من دَہ سال، یک اُمرے اِے لۆگئے تھا گوازێنتگ گڑا من چۆناییا اِے لۆگا یله دات کنان. بله منا اَلّما رئوگی بیت، بله منی نُنّکان کَئے پۆدیت؟ ابُّڑی ماتی منی چُک بے پِت بوتنت، اَبُّڑی بابئے من گار بوتان،،، من نه بوتان ،،، منی چُک بھر کنگ بنت؟ پِتئے زندا منی چُک چۆرہ بوتنت وپسگا که نون دمی بُرت پاد آتک گۆن بانئے کُنڈا تِکّهی دات و نِشت، دۆچگی گُدئے کٹورئے اێرت چمّی کپتنت وتی ائییدئے پشک و چۆٹو جالاری کنگا اَت، گُدی زرت دلئے سرا داشت که نون من په کَئے درێس بکنان؟ منی دئور ھلاس بوت، ھئو بزان منی زندئے ھمراها منی دَہ سالئے مِھر و ھمراھداریئے مُزّ سَئے گَڈّگ‌اَتنت، تئیی دپا در نکُرت؟ منی مِھرا تئیی جیگ کابند نکُرت؟ دَہ سالئے ھمراھداریا تئیی پاد نبستنت؟ تئو گۆن کجام دپا منا گوَشت که برئو تئو منی مات و گھار ائے.
بانئے ڈنّا گلام بجار ھم دێم په چێر کپتگ‌اَت، و دستی سرا اَتنت، ھئیرانت که اِے کُجئے کارے که من کُرت؟ آییا ھئیال کُرت که من کدی ھم چۆ بێھوش نبوتگان که چُشێن کپتگێن کارے بکُرتێنت، بله نون گۆن من بوت، تُک زمینا کپت، من کجام وڑ بکنان که من دوارگ پدا ھما بِبان، آییا سر جَت دُمب جَت که من گۆن کَئیا سَلاہ و شئورے بکنان انگت کَسّ سرپد نه‌اِنت منی چه اِے گاما، آییا ھئیال کُرت که ھان یک راھے هست‌اِنت اگن مَھپلی منّۆک ببیت گڑا الّم اِنت که منی لۆگ رکّیت، منی چُک سران سر نبنت، گلام بجارا ھم مارِت که منی اِے نۆکێن گام که من چِست کنگا رئوگایان اِے په منا یک بلاھێن سزاهے، منی گئیرتئے سرا یک تْرندێن لَٹّے لَگّیت بله منا کنگی‌اِنت.

مَھپلی و شاہ بھت چێرێن کِرد نه‌اَتنت بلکێن دوێن یکّی دومیئے سرا آپ چکارێننت و وَرنت، یکّے دومیا ساھتے مگِندنت وھدِش نگْوَزیت، پدا ناکۆزاتک اَتنت ھر وھدا دوێن یکجاہ اَتنت، ملائے گْورا جُزئے وانگا ببیت، کُڈّکی ببیت، دُتّکئے نادگ ببیت چاہ بھت و مَھپلی گۆکانی ھمراھیا ھمۆدا اَتنت، اِے وه کسانیئے گپّ اَتنت، ماہ و سال جُنزان بوتنت، مَھپلی ورناییئے دَرا سر بوت شاہ بھت ھم ورنا اَت، آ یک دراج بُرّێن، بُرز پۆنزێن و وشّێن سبزے اَت بله ھما سبز که استار چه آییا دلمانگ بنت و مَھپلی ھم گِرد سَر و گِرد دێمێن اسپێت کۆچکێن جنکے اَت، نون آ گْوَنڈوییئے دئور و نئوبت ھلاس اَتنت نون ورناییا وتارا پَدّر کُرتگ‌اَت، و اِے انچێن دَئورے اَت که آس و اَپُرس، اشیا چه پێسر که اَپُرس آس بگیپت مَھپلیئے ماتا آییارا چاگردئے جھل و برز سرپد کُرتنت بله نون دێر گْوستگ‌اَت مِھرئے تُم درچکے جۆڑ بوتگ‌اَت، مَھپلیا ھم نزانت که کدی منی واھگانی تئوار شاہ بھتئے زِردئے چمّگا ترینز ترینز کنت، آس دوێن نێمگا رۆک‌اَت بله بلۆچی لَجّ و زبانان لگام داتگ‌اَت، واھگ انچۆ ھم بێمئیار نه اَتنت که رزوایی وتی پنجگان اێر بِدنت و راج په جنکئے ودی کنگا سَد رندا ھئیال بکنت، یکّے دومیا کدی یکّے دومیارا اِے سرپد نکُرتنت که کَئے په کَئیا دلئے تھا چی و چۆنێن ھئیال داریت، شاہ بھت انچۆ که مَھپلیئے ناکۆئے چُک‌اَت، لۆگئے تھا پُترت و درا هست‌اَت بله کدی ھم آیان لکیرا چه آ دێم وتی گام اێر نکُرتگ‌اَتنت. شاہ بھت دلا دلجم اَت که منا ناکۆ الّما وتی زامات کنت بله آییا نزانت که بھتا سالۆنک چه نکاها پاد کُرتگ‌اَنت، و بانۆر چه کبکھان مُرتگ‌اَنت، انچۆ گُوشنت که بھت کپیت اُشترئے سرا ھم کُچک وارت، بزان انچۆ شاہ بھتارا چه اُشترئے سرا کچکا ھَب چت، و بکت و نسیبا وتی لئیب پێش داشت، زِرد ویرندان بوت اَنت تاکے ھم وتی جاها نه‌سُرِت، کَسّ چه کَسّ سرپد نبوت، مَھپلیا وتی راجئے دێما سَر جھل کُرت، شاہ بھتا ھم وتی دل سَھڑێنت، دلا جاھِلی باز کُرت بله شاہ بھتا گئیرتئے لئیب نزانتگ‌اَت، آییارا وتی ناکۆ و ناکۆزاتک مَھپلیئے گئیرت چه ھر چیزا دۆست‌تِر اَت، زمانگئے رسم و رئواجان آیان چه باج بُرت.