رکشنده تاج بلۆچ3
میر باھۆٹا گوشت، من وتی بَچّئے بێڑا گِران، مردئے بێڑ په دێری گار نبیت بِچار باھۆٹ جان رَدی چه مردما بیت بله اِے ھۆنا منا ببکش تئو وتی بێڑا گِرئے، اِے پدا وتی بێڑا گِرنت شما یکّے دومیا چه کم نه‌اِت. انچۆ شمئے بێه ھلاس بیت. منا شئیه کمبرا بِچار، اِے دیوّان نێم شپا دان هست بوت، گُڈّیا میر باھۆٹا پئیسله کُرت که دادالله مارا وتی جنکے بدنت، منی پئیسله ھمێش اِنت، اگن داداللها را سُجّیت گڑا دێما بکِنزیت، اگن نن گڑا منی گپ ھما اِنت، میر داداللهئے دێم سیاہ تَرّ اِت، شئیه کمبر جانا میر داداللها را گوشت، ھان میر گڑا نون؟ باھۆٹ جانا وتی پئیسله دات، بارێن تئو چے گوشئے؟
میر داد اللهئے تئوار چه گُٹّا در نئیاتک بله پُردلا الھان کُرت نه ما اِے وڑ نکنێن، اگن میر جنگ لۆٹیت گڑا سِنگ ما ھم دستن نکُرتگ، داداللها پُردل مان بست، بس کن تئو ۔۔۔ تئو سیاھیچک وتی دێما مُشتگ‌اَنت بله منا وتی کُٹم کُشگی نه‌اِنت. وتی گُرّگان وتی گْورا بِدار، میر داداللها گۆن وتی مردمان مشورت کُرت و رزامندی دات.
میر داد الله گۆن وتی دوێن بچّان لۆگا شُت داد اللهئے لۆگیا وتی بچک دیستنت گُڑ اِت گوشی ھان بارێن چے بوت؟
داد اللها پسئو دات، ھئیر بوت، اِے وڑا گوَشت و بانا شُت، آییئے لۆگی آییئے رندا بانا شُت گۆن، آییا گوشت، ھئیر بوت؟ بله چۆن؟
داد اللها گُوشت، آیان سانگے لۆٹت و ما نه کُرت نکُرت، آییئے لۆگی برانز گِپت، تئیی ھئیالا مئے جنک هوێن دژمنئے لۆگا رَئوت؟
داد اللها آس لَگّت، گڑا اِے تئیی دوێن مار کشان وتی دێما که مشتگ‌اَنت، زاھر اِنت که یکّے نه یکّیا را اشی مُزّ وا دیگی اِنت، آییئے لۆگیا پدا کوارت، بله من وتی جنکا ندئیان، داد اللها گوشت گڑا وتی بچّان بِدئے بِلّے سرانِش بُرّنت جۆنان اِش گٹرا دئور دئینت، آیانی دستان دیر نجَنت، بچار نێکێن زال تئیی پێش کپتگ‌اَنت، ھئیریا گریت و پێٹورێنت، بله آییا ھم زانت ابێد چه اِے راها دگه ھچ راہ نێست. گڑا چے بوت؟ کربانیئے براک زانئے کَئے بوت؟ مَھپلی ۔۔۔ ھان مھپلی بوت، اِے تئوک مھپلیئے گْورا دئیگ بوت، کَسّا آییئے رزا جست کنگئے تکلیپ ھم نکُرت، آ وتی براتانی سرا کربان بوت ۔۔۔
نه ھم گَنگلان سَئوت جَت، نه لۆٹۆک بوت، ھچ نبوت، نه کِلّها نشت، چُلئے سرا چه پادی کُرت گۆن کُنرتاکان شُشت، دستِش ھِنّی کُرتنت، سرِش گۆن دانیچک و جواز بۆکان گْوَپت، سرئے گْواپئے وھدا آییئے مات آییئے کِرّا نشتگ‌اَت، مَھپلیا چۆ بے کسیا وتی مات چارت، ماتا آییارا چارت نکُرت وتی دێم آنگر کُرت، ھئیریا پدا چارت دیستی که مھپلی انگت آییارا چارگا اِنت، ھئیری مَھپلیئے نزّیک ترا آتک و گوشتی، ماھو منی چُک تئیی سُھر اِنت آییا گوشت و پاد آتک و شُت، سور؟؟؟ مَھپلی ھئیران اَت که سُور اِے وڑ بنت؟؟؟ بله کئی گۆما اِنت سُور؟؟؟ مُچّیئے تھا چه یک جنێنیا گُوشت، شَرّ اِنت که اِے پئیسله کُرت و وت مان وت بوت اَنت، دگه بارێن چے بوتگ‌اَت، دگه یک جنێنیا گوشت دگه چے بوتگ‌اَت ھۆنئے بدل ھۆن بوتگ‌اَت، سرئے مَٹ سر بوتگ‌اَت، مَھپلیا نون ھئیال کُرت که من ھۆنئے دێما دئیگ بوتگان، من وتی داوادارانی لۆگا رئوگایان، بله منی گناہ و مئیار؟؟؟ منی چے مئیار؟؟؟ آییئے دل یک کُنڈیا چه شاہ بھتئے اکس چئول جنان بوت، آییا وتی دل مُشتا کُرت، تان بێگاها آییا سنبھێنتِش تئیارِش کُرت، مگربئے وھدا نکاهئے مردم آتکنت، سَئے مردێن بانا پُترت، مَھپلیئے سر جَھل اَت، چَمّی بند اَتنت ھمێشانی تھا چه یکّیا جست کُرت، تئیی نکاهئے پِت کَئے اِنت؟ تئیی نکاهئے پِت کَئے اِنت؟ تئیی نکاهئے پِت کَئے اِنت؟
کَشئے جنێنا تئوار دات، واجه شئیه کمبر جان اِنت نکاهئے پِت، پدا ھمے مردا گۆن وتی ھمراھان گوشت، سنگتان شما اِشکت؟
ھئو ما اِشکت، یکّیا رنسا گوشت، ھئو ما اِشکت۔۔۔
مَھپلیئے سُور اَت، سری چِست کُرت و ھئیالی کُرت، اِے تئوار؟ اِے تئوار؟ اِے تئوارا من چۆن بێھئیال کنان، اِے شاہ بھت اِنت، بله شاہ بھت منی جستا آتکگ؟ آییا چه گُشانئے ٹُنگا چار اِت، بانئے دپا یکّے وتی چباھان پادا کنگا اَت، ھئو اڑه کسمت اِے شاہ بھت اَت، شاھو اَت، مَھپلی ھمے ھئیالان اَت که وتاسان تئوار کُرت، ساھتیا پَد کسے آتک و آییئے چپّێن کَشا نشت، مبارک بادی دئیگ بوت، سر مان ڈوکی دئیگ بوت، مَھپلیا انگت نزانت که منی مرد کَئے اِنت؟؟؟ جنێن آدم درا در آتکنت چه بانا مَھپلیا کڑی زانت که منی مرد گلام بجار اِنت.
