نبیسۆک: ادیب مهر

لال و بِلال هر دوێن یک جاه، شاھدربرجاہ، دانشگاها، درس وانگا اَتنت.لالا هئورباز دۆستَ بوت! لالا گوَشت: هر کس نۆد و جمبران هئور بکنت منی سرا گوارێنیت ،  من گۆن آییا سور کنان.

بِلالا، لال سک دۆستَ بوت، آ دانشگاهئے شررنگ ترێن جَنکّ‌اَت، آییئےجتگێن دُنانی وشبوی‌ سجهێن وانگ جاها شِنگ اَت آییا انچێن هدای هُسن و رنگ و دانگے گۆن‌اَت بِلال په آییئے گِندگا مَلار اَت.

بِلالا گۆن آییئے دزگهارا ماریا گوَشتگ‌اَت ، تئو برئو لالئے کِرا و آییا بگوَش بِلالا ترا سک دۆست بیت.

تئو گۆن بِلالا سور کنئے؟ بچار، گۆن تئو لال چه گوَشیت!

ماریا گوَشت شرێن. ماریا گۆن بچکندانا لالئے کِرّا شُت بلالئے کلئوی سر کرتنت.

اُو جنکّان پهک بیاێت مرۆچی منا وشّێن گپے په لالا گۆن اِنت شمای هم به‌اِشکنێت. دراهێن جنکّ بچکندانا مُچ بوتنت، لالئے دزگهار،ماریا بچکندگا اَت، ماریا وتی گپ گۆن لالا گوَشت.

لالا دراهێنت: تئو زانان منی شَرت گۆن بِلالا نگوشتگ ، ماریا گوَشت نه ، لالا کند اِت و گوَشت برئو بگوشی ، که لالا گوشتگ تئو هر وهد هئوران منی سرا بگوارێنئے، گڑا من گۆن تئو سور کنان.

ماریا شُت ، بِلالئے کِرّا گوشتی بِلال بیا، بِلال آتک و ماریا گوَشت لالا گوشتگ ، هر وهد منی دل بلۆٹت ، تئو اگن آ وهدا منی سرا جمبرا بگوارێنئے من گۆن ترا سور کنان. نون بِلال هَئیران بوت، ماریا لالئے کلئوه بِلالا داتنت ، ماریا کندان شُت ، لالا جُست کُرت: <> ماریا ءَ گوشت. بِلال پِکر کنگا لگِت من هم آتکگان. نون بلال پِکرا اِنت که چۆن جمبرا بگورارێنان.

آ شت، ماتئے کِرّا گوشتی: من جَنکّے در گِپتگ بله آ جَنکّ گوشگا اِنت هر وهدا منی دل بلۆٹیت جمبران هئور بکنت ومنی سرا بگوارێنیت، من گڑا گۆن آییا سور کنان . بِلالئے مات، لالئے گپئے متلبا سرپد بوت. بله گۆن بِلالا هچی نگوشت.

ماتا دراێنت: ابا من نزانان، تئو چۆن هدائے جمبران لالئے سرا گوارێنئے!. بِلال لَگِت گِرێوگا ، بِلالئے مات بچکندگا لگِت و زانت، که نون بلال په لالا زوت رسیت .

نون بِلالئے وانگئے رۆچ هم نزیک اِنت که برئوت په وانگا. بَلال چه لۆگا در کپیت و سرا برزَ کَنت په آزمانئے نێمگا که گِندیت، هچ جمبر نێست بِلال پَرێشانَ بیت رئوت دانشگاها گِندیت لالئے ڈکُمێن مودان و زاگُلێن چمان بِلالئے دل اێر مِرِیت.

بلال همۆدا گرێوگا لگیت، لال، بلالا گوشیت بلال منا ترا کبول اِنت، تئیی اِشک من پچاہ آورت و هروهدا من گۆن وتا گوشتگ تئیی چم چۆ هئورئے وڑا په منا بگرێونت گڑا تئو منا په دۆست دارگا ائے. من مرۆچی دیست تئیی چم په منا چۆ هئورئے پئیما ارس گوارت.

گڑا بِلال په لالا رسِت، آیان سانگ و آروس کرت