شُد
The article below is not in standardized Baluchi. We are currently working on it and will provide an updated version soon.
نبیسۆک: ادیب مهر
اے کسّه یک هُردێن بلۆچ بچکّێئے بارئوا اِنت که شُد و پکیریئے آماچ انت و کسان‌سالێن اُمرا بازێن بزّگیئے هردان باید بڈّا بکنت.
گوَنڈل گۆن ماتا سکّ شُدیگ اتنت و آیانی ورگ و چرگی سامان کُٹتگ‌اتنت. آ دوێن ھدائے آسرا نشتگ‌اَتنت و آییئے ماتا ھچکس نِێست اَت و آییئے ماتئے ارس ٹپ ٹپا رچگا اتنت و گوَنڈلا ماتئے ارس دیستنت گوَنڈلا لۆگا نندگ برداشت کُرت نکرت. گوَنڈل در کپت که کارے شۆھازَ کنان و آییئے پادئے چمپل یکّے کمُّک سِستگ‌اَت و آییا گۆن سادا ٹٹَاتگ و بستگ‌اَت. آ بێوسێن گونڈل بازارا دکّاندارئے گوَرا شت گوشتی” :ناکۆ، شمئے گوَرا کار هست؟ منَ لۆٹان کار بکنان “.
دکّاندارا آ یک برے چارِت پدا زالمێن دکّاندارا هکّل دات و گوشتی: ”برئو گچی تئو گۆن گچیێن گُد و پچان مئے گِراکان تاچێنئے. “گوَنڈلئے چمّ ارسیگ بوتنت و آ کمُّک پرێشان بوت. پدا دومی دکّاندارئے گوَرا شت. دومی دکّاندارا گوشت: ”من ترا کارا دارآن. رۆچے دو هزار تومن هم ترا دئیان بله منا شرتے هست‌انت. “گوَنڈلا گوشت:” واجه تئیی شرت چے اِنت. “
دکّاندارا گوشت: ”منی شرت اِش اِنت که تئیی واستا من پُچ و چمپلانَ زوران و اے چمپل و پچانی زران من تئیی پگارا چه زوران چیا که اے کوھنێن گُدان گراک تئیی گورا نئیاینت و من تئیی چمپل و پُچانی زران تان پنچ ماها زوران رندا من ترا زر داتَ کنان. “گونڈلا گوشت: ”من گُدَ نلۆٹان منَ رئوان وتی ماتا گوشان منی گدانَ شُدیت. هرجا درتگ‌اَنت من گشانی پچِش جنت. “دکاندار کندگا لگِت و گونڈلا کلاگ گرگا لگِت.
گونڈلا گوشت: ”باور کن منی پچ نۆک بنت. منا تئو کارا بدار و بس. “ دکاندارا گوشت”:چُشێن درتگ پچانی جاگه مئے گورا نه‌اِنت. “دکّاندارا گوَنڈل هکّل دات و چه وتی دکّانا کشِّتی. گونڈل هئیران و هبکه بوت که منی درتگ پچیا مردم گندنت منا کار ندئینت. آ یک کرّے شت نِشت پگر کنگا لگِت چمّی چه ارسا پُرّ بوتنت. گوَنڈل چه شهرا در بوت و دریائے لمبا شت کِرّێا نِشت، و گوَنڈلا دیست که لهتێن مردم مُچّ اَنت و نام نبیسگا اَنت و کسانێن گوَنڈلان تئوار کنگا انت گوشگاا َنت که هرکسێئے اُمر ۱۰ تان ۱۲ سال اِنت ـ بیئیت وتی ناما نبشته بکنت و لئیب و گوازیا هۆر ببیت و بھر بزوریت. آ پاد آتک و آیانی نزیکا شت. آیان گوَنڈل تئوار کرت که تئو لئیب و گوازیا بھرَ نزورئے؟
گوَنڈل گوشت بله. آیان جُست کرت تئو چه کجا آتکگئے. گوَنڈلا گوَشت من چه یک دیرێن مێتگێا آتکگان. آیان که گوَنڈلئے پُچّ و چمپل دیستنت آیان گونڈلئے سرا سکّ باز بزگِش بوت و گونڈلا دل داشت نکرت، گرێوگا لگِت. آیان گونڈلا گوَشت تئیی سرا چه گرانیے آتکگ که تئو گرێوگا ائے. گوَنڈلا گوشت: ”منی مات شدیگ اِنت مارا هچ نێست‌اِنت. منا بِلێت من اے لئیبا هۆر ببان بلکێن اِے لئیبا من بکَٹان و وتی ماتا چُنڈے نگن دات بکنان. “آیان گوَنڈل تسلّا دات و گوَشت: ”تئو ابا اے لئیبئے تها هۆرے و تئیی نام ما نبشته کرتگ. “آیان گونڈلئے سرا دست مُشت و پدا گوَنڈلئے تسلّا دئیگا لگِتنت.
آیان و گوَنڈلا گوشت: ”هرکس اے لئیبا ائول ببیت آییا ۳ میلیون تومنَ رسیت.“ گڑا گوَنڈلا گوشت: ”شر اِنت “گونڈل باز وش هال بیت بله باز آ سک شدیگ ات و هچ گوشتی نکرت که من شدیگ آن. گونڈل وتی دلا جێڑهگا اَت بارێن من اے لئیبا کَٹّان یا نه، من کمزۆر آن بله وتی جُهدا کنان. آ وتی دلا چه پاکێن پروردگارا مدت لوٹگا اَ‍َت گَونڈل انچۆ ودارا اَت که لئیب زوتّ بنگێج ببیت. ھمے ودارئے تها نێم آدارا رند لئیب بنگێج بوت. گوَنڈلِش تئوار کرت. گوَنڈل مئیدانئے تها شُت. گوَنڈل باز تیز و پکا اَت و لئیبئے تها ائولی نپر بوت. آیان سه میلیون تومن گوَنڈلارا داد دات. گوَنڈل باز وشهال بوت.
په وتی ماتا گوَنڈلا شام زُرت و شت. ماتا گوشت: ”ابا تئو کجا بوتگئے؟“ گوَنڈلا گوشت: ”امّا من کارئے شۆھازا شتگان، بله منا کار نرستگ. بله یک جاهے یک لئیبے بوتگ، من هما لئیب کٹتگ و آیان منا سئے میلیون داد داتگ. مات په اے ھبرا سکّ باز وشهال بوت و ماتا وتی چُک امباز کرت و گرێت و په وت ورگِش جۆڑ کرت و گۆن همے زران وتی روزگارِش گوازێنت و شر بوتنت. مات و چکّا هۆریگا وشێن زندگیے بنگێج کرت، هدائے شگر و منتِش گپت. آ چه شُدا رکّتنت.
